KONTRASTET E JETËS
Nga Luan Çipi
Jeta, mbushur me kontraste:
Diku plotë e diku bosh.
Do t’i numëroj ca raste
T’i kujtosh, t’i numërosh:
Njëri, mezi gjen pakëz bukë!
Tjetri, me qejf shijon verën!
Jeta ikën ngul e nduk,
Sa hape e mbylle derën!
Ca në ditë, hanë një vakt,
Ca bollëk: mish e byrek,
Ka që flenë me barkun thatë,
Ca të ngopur, fryrë kacek!
Ca nuk dinë ku i vënë paratë,
Dikush nuk sheh lek me sy,
Ka stoli arri, te gratë,
Ka dhe gra në varfëri.
Ca vuajnë mbyllur në burg,
Dikush zgjidhet deputet,
Njeri në kishë: prift a murg,
Pushtetari, nuk të pret.
Dikush bëhet shumë i pasur,
Tjetri shegert, shërbëtor,
Njeri parajsën ka hasur,
Tjetri shurdh, memec a qorr.
Një shkencëtar, a filozof
Tjetri shkallon, zë çmendinën,
Njeri kostumin me stof,
Tjetri, copash gabardinën.
Dikush martuar tre herë,
Një beqar i staxhionuar,
Shumë fëmijë dikush ka lerë,
Tjetri, veç ka adoptuar.
Një se gëzon fëmijërinë,
Tjetri mbushi njëqind vjeç,
Njeri e ndërtoi shtëpinë
Tjetri, epitaf në shesh.
Një i pasur: prona, shtëpi,
Tjetri ngeli, po emigrant,
Një më këmbë, mezi që rri,
Një argaliset me gratë.
*
Je, si je, mos ki merak:
Të gjithë njësh, do jemi shokë,
Sot me frak a me duvak,
Nesër, ndenë një metër tokë!
Tiranë, më 05.05.2018
Comments
-----
