TREVLLAZRO, GJERDAN ULLIRI*
Nga Albert HABAZAJ
Thëllëz’ e bukur e fushës,
A shqipe në fluturime,
A gjerdan ulliri gushës,
Trevllazro, vendlindja ime!
Gjysh, stërgjyshi – buk’ e ardhur,
Si fshatin tim nuk kam parë,
Lavdi kush na e ka falur,
Kush e do – faqen e bardhë.
Kush e mba këtë shqiponjë
I shkeltë këmba në mjaltë.
Bota me mirënjohje thonë:
“ Kam një mik në atë fshat!”
Gjysmë shekull a më shumë
Nga një fis e nga një farë,
Buruan të mirat lumë
Nga tre vëllezër bujarë:
Çeçon, Shakon, Rrapon kemi
Firmëtar’ për emrin tonë,
Me uratë të tyre jemi,
Si princër me nder jetojmë.
Myrtajt e Meminjat shtohen,
Qëndisin kodrat me pyje,
Me djersën e ballit ngrohen,
Si një vallëzim me yje…
O hambar i Topalltisë,
Me ty flori prodhon dheu,
Se ësht’ zot – zot i shtëpisë,
Bujku ësht’ më bej se beu!..
*Mjeshtrit të polifonisë, Pelivan BAJRAMAJ,
sipas dëshirës së bashkorigjinasit tonë të dashur Mikel LUTAJ, emigrant në SHBA.
Vëllazërisht Albert HABAZAJ
Këngë për Grupin e Trevllazërit, Vlorë
Comments
-----