Ajri është plot nerv e gaz

Cikël me epigrame nga Viron Kona

 

Ajri është plot nerv e gaz

Sherrit shmangu, iu largo,

ajri është plot nerv e gaz,

një fjalë kot dhe e nxituar,

shkëndijën e ndez në çast.

 

Harrove të tjerët

I shkele ata që kishe përpara,

i godite ata që ishin më lartë,

me bërryla dhe me shkelma,

në të djathtë e në të majtë…

Për diçka s`të vajti mendja:

për të tjerët që t`vinin pas…

 

Thashethemet

Thashethemet janë si retë,

njolla-njolla mbulojnë qiellin,

por, kur ndodh që bëhen bashkë, 

ia arrijnë t`mbulojnë dhe diellin.

 

Deri kur?

E ngarkuan me famë dhe lavdi,

e bënë edhe kalorës të parë,

ti ende gulçon pas tij,

deri kur do t`hiqesh zvarrë!?

 

I ngjitur

Je bërë i “famshëm”,

duke iu ngjitur pas anijeve madhështore,

herë si midhje e zezë, herë si gaforre.

 

Qafiri

Shuhet zjarri,

mbetet hiri.

Pas betejës,

mbërrin qafiri.

 

 

Përfitim nga mirësia

Kur pëllumbesha ngrohte vezët,

qyqja, vezën e saj i lëshoi në fole,

pëllumbesha e dhembshur s`bëri zë,

bashkë me të sajat çeli dhe vezën e re.

“Kuu-kuu” -thirri qyqja,-ç`fat i shkëlqyer!

këtej e tutje do të bëj qejf në jetë,

jetën e vogëlushëve të mi të dashur

shpendëve të tjerë po ua lë amanet!1)

1).Qyqet nuk ndërtojnë fole të vetën, por të vetmen vezë e  lëshojnë në foletë e zogjve të tjerë.

 

Piedestali “bosh”!

Kur diktatorin e tërhiqnin zvarrë,

e pështynin dhe e zhgërryenin me baltë,

“Mbreti vdiq! Rroftë mbreti!”1),-thoshte ky tjetri,

dhe e përfytyronte veten në piedestalin e lartë.

1).Thënie në oborret e dikurshme mbretërore “Mbreti vdiq, rroftë mbreti!”

 

Më keq e pëson!

Po e ngacmove qenin, të kafshon,

po e ngacmove grerëzën, të thumbon,

po e ngacmove gjarprin, të helmon,

po e ngacmove njeriun, më keq e pëson!

 

Siç përdor ti karremin për peshqit

Kujdes, kur të panjohur

të dehin me verë e raki,

siç përdor ti karremin për peshq,

ata peshkojnë mendime tek  ty.

 

Vonë

Mos shkruaj gjëra të dyshimta,

se mot  e jetë mbeten aty,

kur një ditë bëhesh pishman,

s`i heq dot, janë bërë  dëshmi.

 

Mos fol pa mend

Mos i jep shumë gojës,

mos fol fjalë pa mend,

dikush po pret rastin,

t`i përdor në dëmin tënd.

 

Ligje

S`mund të jenë të drejta,

qoftë dhe në demokraci,

ligjet që prodhojnë dhunë,

uri dhe pasiguri.

 

Comments

comments

-----